Dimorphos

Aliej i eri stàt tentàt di sercjà chel bièl func ch'i vevi cjatàt in tal me ort, ma il pensej che il func al fòs stàt un amanita di chej velenòus a mi veva fàt na poura da mat, e cussì i vevi bandonàt l'idea di mangjalu, e di contentami invensi di gòdimi la so bielesa. Dut benòn, alora: i podevi cussì tornà a calmami e a vivi di nòuf la me sòlita vita, che par tran tran ca sedi a à almancu la virtùt di èsi na vura prevedìbil in ta la so regolaritàt.

Ma vuej se susèdia? A susèit che la NASA a à apena anuncjàt che domàn un daj so ras al zarà a sbati in ta Dimorphos, na lunuta dal asteroid Didymos. I no vèis nisuna idea di cuant che chista intensiòn da la agensìa mericana a mi fà tremà da la poura—e na vura di pì dal timòu di vignì velenàt da chel fungùt spuntàt fòu in tal me ort. I pensarèis: ma daj, daj, a no ocòr dasi nisùn pensej; che chistu sperimìnt da la NASA a nol zarà a fàighi mal a nisùn: al sarà coma mandà un muscjn a scuntrasi cuntra il tronc di un moràr. I vorès tant encja jò vej che fede ch'i vèis vuàltris, che certesa ca no susedarà nuja di brut, e che duncja i podìn stà in pas e zì a durmì cun trancuilitàt. Magari ch'i la pensàs cussì encja jò! E invensi jodèit vuàltris sè ca mi pasa pal cjaf. Il asteroid Didymos al è pì o màncul 11 miliòns di chilòmetros lontàn e, se nisùn a si mèt a tichignà cun luj intànt cal fà i so zìrus bigulòs atòr dal soreli, a ni sigura la NASA ca no è nisuna pusibilitàt cal vegni maj a scuntrasi cu la nustra cjera e fà chel fracàs che n'altri famòus asteroid al veva fàt incovolta daj puòrs dinosàuros. Ma la NASA a si mèt pròpit a fà chel tichignès ca sà ca no varès da fà: a vòu jodi se il sbati dal  ras cuntra Dimorphos al zarà a fàighi cambià diresiòn. Chistu tichignamìnt da la NASA al è ben intensionàt; i soj il prin a amètilu. A sà ch'i no vìn nuja da temi da Dimorphos (s’i no zìn a tocjalu): a vòu doma jodi se na buna dì a ni sarà pusìbul fàighi fà na deviasiòn a cualchi pìsula lunuta ca stà vign dreta vièrs di nu. L'intension a è buna, i lu ripèt. Ma dišìn che il sperimìnt al funsioni benòn, e che Dimorphos, che adès a no ghi interesa nuja dal nustri planeta, al cambi sul seriu diresiòn e a si meti dut ta un colp a svualà vièrs di nu. Chel lì, buna zent, al è il me grant timòu, timòu mil vòltis pešu di chèl di zì a sufrì il mal di pansa par cauša di un func: che chista lunuta che adès, contenta e beada, a stà zìnt atorotòr di so mari Didymos, a vegni a fracasasi in ta la nustra puora cjera, caušànt un scumbusulamìnt da l'osti e che dùcjus nuàltris i zini a finila coma i stregosàurus di na volta. Che lì a è la me poura—e i no saj s'i rivaraj a durmì stanòt.