Being Human, etc

I contavi aliej di come che il film Being Human a ni dà na dimostrasiòn di coma che il grant valòu da la lenga furlana a è da cjatalu no al livèl di utilitàt ma al livèl da li emosiòns: nisùn, al sinti il cjacarà da la Galiena, a si ferma a fà calcuj di gramàtica o di grafìa; a si la gòt invensi a sinti la bielesa daj so suns. Praticitàt: ?; estètica: 10.

 Nisùn a si surprìndarà se, in ta un sit ch'a si clama “Furlània,” i torni a fà na oservasiòn o dos su la nustra lenga furlana, màsima cuant che, coma ešèmplis, i vìn Williams e la Galiena.

A ni dìs il Programma Generale di Politica Linguistica che la rašòn principàl di chistu programa al è chèl di “rendere il friulano una lingua parlata e scritta in ogni situazione comunicazionale della vita pubblica e privata”, permettendo “ai cittadini di esercitare a pieno il proprio diritto di espressione in lingua friulana, senza la necessità di dover ricorrere ad un’altra lingua”. 

Prima oservasiòn: cuant che nuàltris furlàns i vèvin na cognosensa na vura rudimentàl da la lenga taliana, alora sì che na buna cognosensa dal furlàn, màsima chèl burocràtic, a ni varès zovàt tant; ma incovolta nisùn a no ni lu insegnava, e cussì i si rangjàvin cul furlàn di cjaša, o di plasa, o di strada o di stala; cul furlàn, insoma, ch'al vegneva dal còu. Encja il taliàn a ni varès zovàt tant, ma in taj àis cuant che il livèl di istrusiòn ch'i vèvin al era la tersa o la cuarta elementàr, il taliàn par tàncjus di nuàltris (forsi pa la granda magjoransa di nuàltris) al restava na lenga foresta. Vuej invensi, cuant che dùcjus i podìn no doma “ricorrere ad un'altra lingua” ma scrivi e conversà benòn in lenga taliana, èco che vuej i stìn tramànt sù (o almàncul il PGPL al stà tramànt sù) manièris par podej competi, e magari rimplasà, che altra lenga (il taliàn) che belzà i cognosìn.

Seconda oservasiòn: chèl di rindi “il friulano una lingua parlata e scritta in ogni situazione comunicazionale della vita pubblica e privata” al èše un ben o un mal?  A livèl di utilitàt al è sens'altri un ben. Ma al rèstia un ben encja a livèl culturàl? Se par doventà pì ùtil il furlàn al à da standardišasi, al rivaraja al stes timp a ritegni i so aspiès culturaj, che, a mi pàr a mì, a sòn na emanasiòn dal furlàn di cjaša, di plasa, di strada e di stala—furlàn che par cjatalu e ritègnilu a tocja zì, sinò ta li stàlis, ch'a no sòn pì, almàncul in ta li cjàšis e'n ta li stràdis e'n ta li plàsis daj nustri paìs indulà ch'a sòn li variàntis, e no il standard, ch'a riflètin il spìrit e il còu da la nustra biela lenga? A saràia sul sèriu pusìbul ritegni la cultura furlana se la standardišasiòn a compuarta il sacrifisi da li variàntis, o se a li variàntis, in tal so insièmit, a no ghi vèn dàt sinò di pì, almàncul il stes valòu dal standard?

Utilitàt o estètica?

(I jodèišu se strambolòs ch'a sàltin fòu cuant ch'a si si mèt a vuardà cìnes coma Being Human?)  🙂