Lenga standard?

 Coma che, sùbit sot, i ài dimostràt il tal me comènt su la lenga ingleša, il standard al è na roba ca coventa e ca no coventa. La lenga ingleša, cu li so variànts—britanica, sudafricana, americana, australiana—a ni insegna na roba na vura importanta: ca è pusìbul par na lenga di vej divièrsis variàntis cun paritàt di valòu e mèrit. Il standard al ešìst, ma al ešìst sensa che rigiditàt ca ghi sarès di intrìc a ogniduna da li variàntis di esprìmisi in ta la so maniera ùnica e distinta.

Il cašu dal furlàn al è diferènt in maniera sostansiàl. Chèl che vuej al vèn clamàt il furlàn koinè o standard al è in tal so complès il furlàn di una da li variàntis da la lenga furlana. A è coma se—in tal cašu da la lenga ingleša—la variànt australiana a vès da proclamasi standard, e che par chèl che altri variàntis a varèsin da inchinasi davànt da la australiana.

I no soj tant al curìnt da li particularitàs da li ròbis,…, ma i no cròt di ufindi la realtàt s'i pensi che al dì di vuej il insegnamìnt dal furlàn in ta li scuèlis furlànis, includìnt la universitàt di Ùdin, al vèn fàt, cun ecesiòns—s'a ešìstin—ràrìsimis, in ta doma una da li variàntis da la lenga. La stesa roba, i cròt, a vàl pur pal sopuàrt econòmic che il Friùl al risèif da Roma, e la Arlef dal Friùl, pa la tutela no di ogni variànt da la lenga ma di doma una da li so variàntis. (Ešempli: la Àrlef a è pròpit in ta scju dìs ch'a ghi ufrìs ai comùns i bes par modificà i segnaj da li stràdis, a pat che li modìfichis a si tègnin a li règulis da la marlilenghE.)

Par fala curta, … , chè di tègnisi “adun” a podarès èsi na roba amondi fàsila: bastarès che la “tutela” da la lenga furlana a ricognosès che ogniduna da li so variàntis a mèrita il stes rispièt ch'a ghi vèn dàt a ogniduna da li espresiòns da la lenga ingleša.

Ermes C

(Ps. Che la nustra biela lenga a rivi a “sorevivi” cu la esclušiòn da li variàntis a è discòrs par n'altra volta.)