A è na fiaba, chista, ch’ l’ai tramada sù jò, ma che in ta la so sostansa a è puc diferenta da li storiùtis ca ni contava me mari, coma chè da la gušiela, che coma chè di Genovefa a mi è restada stampada in ta la mins.
A ni contava la puora mari, in ta che ora dopo sena, intànt che, dopo vej distrigàt la taula e rešentàt plas e scugjèlis in tal seglàr, a comedava calsetòns e barghèsis ingrumàdis in ta la taula, a ni contava, coma ch’i dìs, la storia di chel omp che da frut al veva robàt na gušiela, na roba da nuja; ma che dopo di chè al veva robàt na roncja e dopo di chè a si veva metùt a robàighi òufs a li gjalìnis di un visinànt, a cul zì dal timp al veva paràt via a robàighi a la zent dal paìs ròbis di valòu sempri pì grant fin che a la fin al era stàt cjapàt e mandàt in galera.
Finida la storia, a ni mandava a durmì, la nustra mari, cun la racomandasiòn di èsi sempri onescj’ e di maj, ma maj profitasi da la roba daj àltris s’i no volèvin zì a finila coma chel puòr omp da la gušiela. I dìs chel “puòr” omp parsè ca è pròpit cussì che la me puora mari a lu minsonava: un puòr omp, un omp insoma cal meretava di vignì comišeràt. Encja s’al era un omp zùt di mal, me mari a veva lo stes dòu par luj, e a varès volùt che encja nuàltris i cresèsin cul vej compasiòn—e maj disprès o odiu—vièrs zent cussì. La pietàt—la caritàt cristiana— a era cussì ingranada in me mari che par ic a no ešisteva nisùn ca nol meretava almancu un ninìn di compasiòn. Par ic encja un re al meretava compasiòn, cussì che mentri che par àltris il re al era na “maestàt” par ic al era un puarèt di re. S’a fòs encjamò in vita, e s’i intivàsin di discori di zent coma Donald Trump o Berlusconi, a no mi surprindarès par nuja di sìntila minsonaju coma chel puarèt di Trump, o chel Berlusconi, puarèt. Tant par no cunfùndisi, il so ušu di “puòr” o “puarèt” a nol era, di sòlit, chèl pì comùn, cal vegneva, e al ven, ušàt in sen di rispièt par un muart, coma in tal cašu di me pari, puarèt, o da la me stesa mari, puareta.
Me mari, insoma, a ni contava li so stòris; e li stòris ca ni contava a vèvin sempri, da chèl ch’i mi recuardi, alc da insegnani: o che la virtùt a vèn prima o dopo premiada, coma in tal cašu di Genovefa; o che paj vìsis a si và a pajala cjara, coma cal và a pajala cjara chel puòr omp da la gušiela.
Coma li stòris ca ni contava me mari, li fiàbis pur a sòn stàdis, in taj sècuj pasàs, màsima cuant che nè pìsuj nè grancj’ a no èrin bòis da leši, strumìns di insegnamìnt: di coma ca si varès o ca no si dovarès vivi. Di sòlit na fiaba a trasmeteva na moràl clara e neta, che ognidùn ca la scoltava a la capiva a colp. Ma a’n d’è di fiàbis che dopo vèili scoltàdis, o lešùdis, a ni làsin a bocja vierta, par nuja sigùrs di coma intìndilis.
Li dèis fiàbis daj fràdis Grimm ch’i ài sielzùt di traduši e di includi in ta stu librùt a sòn fra li pì cognosùdis e li pì apresàdis. Fiàbis coma chè di Sinišuta (Aschenputtel)...
No comments:
Post a Comment