Ironia dell’Ariosto

Brano dell’introduzione del mio Orlando il Furiòus (si veda www.lulu.com/spotlight/eculos):

...Ma intànt che che puora fiola di Angèlica a è lì leàda e disperada, èco che il poeta a ni vèn dongja cun un’altri bièl tocùt di ironìa. Cualchidùn, dopodùt, a bišugna cal càpiti chì par salvà chista fantasina, che sinò se mont al sarèsia chistu, cun fantasìnis bièlis ca vègnin sbranàdis da li òrchis mentri che dut inziru i cavalièrs pì rinomàs dal mont a stàn dibànt? No, no; da un mont cussì crudèl e sbalansàt libera nos Domine! Al càpita chì, insoma, Rugero stes, chel guerièr potènt e valoròus (e un bièl puc amletiàn) cal è, in ta un sens amondi reàl, il protagonista pì importànt dal poema. Al è luj, dopodùt, chèl che, insièmit cun Bradamànt, al varà da doventà il progenitòu daj Èstes. E Rugero a Bradamànt a ghi vòu un ben dal mont, coma ca è just. Ma il ben ca ghi vòu a la so futura fèmina, a no ghi impedìs di apresà la bielesa da la puora fiola ca si mèt a salvà dal mostri marìn. E a salvala al và, judàt dal so destrièr alàt, che cun chèl a la mena in ta un postùt no tant lontàn, indulà che

… tal miès d’un prat, a era na fontanuta,
e dongja di lì pur na culinuta.

Rivàt uchì,

… frenàt al veva’l bramòus cavalièr
il destrièr so, e tal pratùt al era dismontàt.
…
Dismontàt dal destrièr, a è pur ver
che’n ta ben altri al sarès montàt;
ma ’l arnèis cal veva ’ntòr ghi lu veva ’mpedìt:
chel mona di arnèis, po, ghi lu veva proibìt.

E chì il puòr Rugero a si veva cjatàt di front un intrìc che di pì grant cuaši cuaši a no’n veva maj nè prima nè dopo cjatàt.

Insiminìt da la primura cussì tant
al era che di disvistisi a nol rivava.
Maj nol veva fadijàt cussì tant;
che se un làs al molava, n’altri a s’ingropava.

A è naturàl che chèl cal lès a si dà na grataduta di cjaf e al pensa: ma Bradamànt? a nol varèsia Rugero da vignì frenàt dal pensej da la so prometuda? E il poeta, chì, coma cal lešès il nustri pensej, a si intromèt a colp e a ni dìs:

Parsè’l varèsia Rugèr da meti’l fren,
adès che cjòisi al pòl il so dilèt
cun la dols’Angèlica che nuda al tèn
ta stu solitari e còmut boschèt?
Bradamànt in mins pì no ghi vèn
che sempri streta al tegneva tal pet;
e se di ic s’impensa coma prima,
mat al sarès se di chista nol vès stima…

A è clar che il Ariosto, par tant cal cjanti da la gloria daj Èstes e da la nobiltàt daj so timps, al è encja pì che bon da cjòiju inziru, coma cal fà in tal cašu di Rugero e di Bradamànt. Li radìs di sta tant laudada cjaša, dopodùt—coma che il poeta a ni lasa savej cun muša ridìnt—a sòn nudrìdis no doma di roba buna e sensa pècis, ma di ledàn pur, encja se stu ledàn al à la scuišitesa da la Angèlica. Ma no stìn pensà che doma Rugero al vedi sti debulèsis, dal dut umànis; encja Orlando, e pì di dùcjus Orlando, il pì grant paladìn da la Fransa, al sufrìs da li stèsis vòis di Rugero e di tancju àltris cavalièrs di nòn, ca sèdin chej o cristiàns o saracèns. Sot ingàn dal magu Atlante a ghi pàr a Orlando—al inisi dal Cjant XII—di sìntisi clamàt da Angèlica, che di chè luj al è straplèn di murbìn.